2018-12-02

【輔仁媒體】鵝鑾鼻燈塔:【返歸撚菊】陶淵明劈炮叫做有風骨;我依家劈炮唔撈,就叫不思進取? (778)

有人問:點解陶淵明當年劈炮唔撈,整左篇歸去來辭,就叫做有風骨;我依家劈炮唔撈,就叫不思進取?

的而且確,陶淵明成日開口埋口都話自己係窮撚(余家貧),所以要去托親友去求官,點知做唔夠八十幾日已經覺得官場黑暗(唔知佢黑暗啲定係香港日日都民主最黑暗黑暗啲呢?),就已經要辭官歸故里。所以人人都讚陶淵明不為五斗米而折腰,但其實仔細去研究番佢啲詩文,就發覺可疑之處甚多。就舉番篇歸去來辭並序一睇,大家都一定會記得一句:

歸去來兮,田園將蕪胡不歸!
(返歸啦屌。田都爛晒仲唔返去升crop rotation 真係靠托咩!)

喂呀,原來你條友返屋企仲有田有地架?咁都叫窮?做文人係咪真係要咁謙呀?你叫陶潛,唔係叫陶謙喎?地都唔耕,無野食,咁梗係窮啦,幫唔到你!但其實諗深一層又唔係無道理:鄉下仲有田可耕,你就梗係可以辭到職啦。依家啲九十後零零後社畜咪有樣學樣添呀,慢慢儲你地既首期啦,望樓價跌?不如叫老豆老母俾仲好啦?

自古以來,都證明有父幹真係無得輸。陶淵明口中喊窮,其實祖上多人為官,就算家道中落,都並不代表一定就要周街乞衣。哼哼,如果唔係邊有辭官辭得咁爽啦喎。你估真係可以寫文望飯食呀?就算係陶淵明都唔得呀,只係佢有得食老本,你無渣。成件事可能就係咁簡單。

之後我地睇埋落去。「載欣載奔。僮僕歡迎,稚子候門。」我真係歸你老味呀!原來返到屋企仲有工人架,仔女都有人湊架,你真心話我知你有幾窮呀!跟住佢既日常生活係:有酒盈樽/引壺觴以自酌/樂琴書以消憂。咪飲下dom 同人夾下band 又一日?幾他調吖。無餘糧又點釀酒呀。最後,「農人告余以春及,將有事於西疇」都係聽人講渣,佢自己有無諗過去做?唔知架。睇下心情先啦。隨時派堆villager 去做添呀!

所以,文人多大話真係無撚錯架。「聊乘化以歸盡,樂夫天命復奚疑」其實係離地中產黎,呢啲咁樣既範文廢左佢本來好地地做乜又拎番出黎教壞細路?會引起階級鬥爭架!

作者:鵝鑾鼻燈塔
鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/


原文連結



0 comments:

Post a Comment