2018-12-03

【輔仁媒體】馮志豪:我愛政府命長久 (1091)

(photo via cc Flickr user Ray Devlin)

「唔好意思,你支持港獨,就算你高考滿分,我哋都係唔可以收你。」香江大學入學處主任說。

高考狀元振英回應「冇喎,我幾時有話支持港獨,我只係話大家可以決定香江嘅前路。」

「因為根據 《思想政治品德考核》,你反對憲法所確定的基本原則的言行或參加邪教組織,情節嚴重,所以我哋唔可收收你。」主任理直氣壯地說。

振英大叫「我地冇反對憲法!」

「你心裡面有, I read your mind。」主任大力反擊。「總之我話你有就有,而且你叫振英就係錯,你心裡面就係戀殖。」

如是者,振英入不了大學,只有死死地氣出來社會工作。他心想振英是原罪,因此把心一橫把名改了做建華,以為就算唔長命百二歲都可以平安下半世。

建華在見工後,明明人事部好似好滿意表現,但遲遲未有消息。正想打去發問之際,就於傍晚六時收到公司人事主任的電郵,入面有幾條問題。

柒建華先生:

多謝你申請我們三級工人職位,請你於今日晚上八時前回覆。

1. 是否同意中華人民共和國擁有香港特別行政區主權?
2. 是否同意香港特別行政區是中華人民共和國不可分離的一部分?
3. 是否確認你真誠地在提名表格上作出擁護《基本法》和保證效忠香港特別行政區的聲明?
4. 是否提倡或支持『香港獨立』是自決前途的選項?

人事主任謹啟

柒建華(係,佢唔係本係姓柒的,只不過林鄭有七七七票, 改姓都係表忠)今次醒呀,全部問題都答支持政府的說話,佢梗係唔敢學在各級議會,連村代表的資格都被取消的迪迪去串政府選舉主任啦。

「唔好意思呀柒生,我地唔可以請你做工友。」人事主任說。

建華錯愕地說「我都話支持政府依法施政,咁都要DQ我。」

「你政治態度、思想品德不合格。」人事主任反擊。「當年有人表示人民自決,你雖然冇同意,但你又冇反對,仲唔係錯?」

「唔反對咁都有錯?」建華忿怒地說。「仲有,你將自己個名叫建華,呢個名唔係人人可叫,你擺明侮辱國家領導人,等同燒國旗一樣嚴重。」

「咁我以後唔駛係香江生活啦!」振英建華發狂地叫。

「亲,我哋安排咗你去新疆再教育營。確保你愉快又寫意。」

「點解,點解我當年甘心做港豬,樂意做心淡派。攪到依家俾人踩到上心口。」

說未畢,柒生就被蒙眼,送上往新疆的火車上。

多謝國家多謝黨,又打擊了壞分子。

作者:馮志豪
馮志豪
一名工作了二十年的註冊社工,近幾年在大學及大專任教,經常在想如何成為總幹事(就是總有幹點事)在中學生時代開始以筆名「詠憫」投稿予正義報章之學生園地,大學畢業後,筆跡及聲音出現於南都、癲狗、蘋果日報和香港電台。


原文連結



0 comments:

Post a Comment