2019-07-21

【立場新聞】葉一知:灣仔是個凶險之地 (1240)


民陣上訴失敗,警方規定,明天遊行仍然以灣仔修頓球場做終點。我很奇怪警方為什麼會有此決定,分析一下灣仔的地形,便知道那是個凶險之地:

1. 遊行過都知,軒尼斯道與金鐘道(近正義道路牌打卡位)係一個樽頸位,路面會由六線轉為八線,向來過咗呢個樽頸位,遊行人士便會鬆一點(六九和六一六則例外因為實在超多人)。但現在終點在修頓,即是喺個樽頸前封頂,就算係幾十萬人,都唔知人潮可以點樣散去。

2. 換個角度,呢個位亦都係咽喉之地。從地圖可以看到,除非開放告士打道(但可能不大),喺灣仔任何道路過金鐘,都要經過這個咽喉之地,所以不用太多警力喺呢個位守住,就等於「收了袋」,灣仔打後形成一個布袋,守住咽喉之地就等於索死了這個袋,遊行人士難越雷池半步。

3. 咁你可以坐地鐵走。但喺灣仔坐地鐵,除非向銅鑼灣方向走,否則全部要喺金鐘轉車。如果地鐵唔停灣仔,即係所有人留喺布袋。畀你上車,喺金鐘轉車站截停,也能一網打盡。

4. 由於明天遊行並非地區性,而是全港性,所以會有大量九龍和新界過來嘅人,所以會有好多人喺金鐘轉車走,除咗住港島東嗰邊或喺北角轉去九龍東。呢一點,大家明天一定要留意。

5. 金鐘係一個商業區,政府部門林立,冇乜居民,但灣仔有一半係民居。從地圖可以睇到,近告士打道的大路係商業區,但近軒尼詩道、灣仔道哪邊全是橫街窄巷,是住宅區。喺呢個位係動用唔到大型驅散武器如催淚彈和水炮車。咁即係剩返巷戰可以選擇。橫街窄巷適合打巷戰,而且港島區不像九龍的旺角,很也就會被迫到山邊,無路可逃。只要少量兵力或用大型武器守住咽喉之地,無人能越,然後把大量兵力調去橫街窄巷追打示威者,係一個好有效嘅策略。

6. 金鐘終點離警察總部只有兩條街之隔,以714沙田的情況看來,仇警心態很重。這個安排有誘敵之意,只要大家(也很自然)按捺不住,前往衝警總,根據以上的安排,只要你一衝便可行動,警察可以任追打,可以「乜仇都報晒」。

7. 灣仔沒有太古廣場,只有小型商場如大友。遊行人士眾多,卻沒有了太古廣場這個休息、補給和避險的地方。

8. 如果金鐘有什麼行動,這個地利也截斷了遊行人士前去支援的力量,哪怕是和理非企喺度打氣,都會大大影響,甚至去唔到。

9. 睇落,地利已失,同時天時也失,因為明天必定是書展最高峰的日子,很多人會一家大細前往,很多小朋友會去。如果因為遊行衝突,灣仔散唔到,自然書展都散唔到,結果真係好難想像。如果書展人士受阻或受傷,特別是大量小朋友,會唔會失人和,也是未知之數。

我唔知道,警方這個決定,是否想決一死戰,還是諗住用最少警力管理,我希望是後者。無論如何,明天是一個全新環境,大家最好預先熟習一下環境。灣仔是警察總部之地,沒有人比他們更了解該區地形和特質。不幸的話,明天情況可以變得幾凶險,因為即使Be Water,但水最怕就是入樽而被定形,水入密實袋,便是最凶險之時。請大家明天務必關注和小心。



原文連結