2019-07-23

【獨立媒體】葉一知:咩叫冇事鬧黑警有事就報警? (1106)

內容:

經常有啲好無知嘅人講(包括今日喺餐廳聽到同埋陳欣健個POST):你哋班人冇事就鬧人黑警,有事就叫人報警催人快啲,很荒謬。

呢啲人先係最荒謬。第一,鬧人黑警,係因為警察制度崩壞,依家唔係少數警察違規咁簡單,我盡能力數一數:暗角七警、朱經緯手臂延伸,呢啲已經係法庭判咗有罪,唔講咁遠,就呢個幾月,制服冇警員編號,永遠唔出示委任證,個樣包到實一實好難認出,然後出嚟濫用暴力,對住人哋阿媽兜頭噴胡椒,圍毆一個送水嘅人,開槍打頭,無端向和平示威者發放催淚彈幾乎製造中信人踩人悲劇……呢啲違規,成隊警察全部當睇唔到,仲得到警隊力撐,七警朱經緯幾難先告得入,之後又發生三萬警X你老母大會,即係話死都唔會認錯。一隊警隊濫權濫武到咁,去到今日仲懷疑放任黑社會喺元朗隨便打途人,又有黑社會名人高調支持,隨便收過千萬捐款,咁請問喺咁嘅領導同制度下,呢啲警察點解唔係變咗黑警?

你按法例同指引去驅散示威者甚至作出拘捕,大家係冇嘢講,問題依家係,你對示威者就一個都唔放過,對住班黑社會,全部放晒。今朝元朗個警司仲話冇能力抄低所有白衫人嘅身份證,幾好笑呀,6月10日凌晨幾百個示威者被趕到灣仔,又有能力抄低晒幾百人嘅身份證喎。咪再一次證實,人哋叫你黑警,係咪唔過份呀?

咁叫佢哋黑警,同時點解唔可以叫佢哋執勤?佢哋嘅糧係成個社會夾份出,目的就係要佢哋除暴安良,咁點解市民唔可以報警同批評佢哋?如果個醫療制度有問題,請咗好多醫死人嘅醫生,然後官官相衛,呢啲醫生全部冇事,咁自然有人大叫黑醫,咁係咪以後就唔可以睇醫生?咁你警察曾經話醫護人員辱警好唔高興,又撤埋警崗,咁一係以後唔好睇醫生吖,有事唔好入醫院吖。

最最最最重要嘅係,法例規定,有事我真係只可以搵警察,如果唔係我搵邊個呢?一間餐廳係黑店,我可以日日鬧佢黑店兼永世唔幫襯,因為我有大把選擇,咁我想問吓嗰啲話「又要鬧人又要報警」嘅白痴,我唔報警,我係咪可以自己請僱傭兵?我係咪可以自己去解決?法例係咪賦予咗我哋平民百姓可以隨便用武力自衛,打死啲仆街都唔使負刑責呀?係咪可以自組另一支警隊,同黑警嗰支抗衡呀?我真係好想呀,你哋不如幫我呼籲政府,畀第二支私人警隊存在啦,畀市民決定畀錢邊支警隊啦,又或者至低限度等我哋成立民間自衛隊可合法使用武力啦。你政府肯,我即刻搞眾籌,我肯肯定好快籌到大筆錢,依家嗰支警隊一年內無錢解散。

如果你話唔得,點可以咁,咁呢啲高人教吓我哋,點解我唔可以報警呀?點解我唔可以批評呀?我有冇得揀呀?冇,就收皮啦唔該。

邊個再講,就用上面兩段摑佢面啦。

(圖為巴丟草作品,摘自蘋果日報,如認為使用不當請通知移除)



原文連結