2019-08-21

【輔仁媒體】庵念慈:【八奇軍師】我開始明白政府玩緊啲乜 (685)

係時候幫大家進入八奇思考領域。

林鄭到今日記者會都未宣布退役,睇怕呢位女優都同大家玩一場硬仗。我係度不斷思考,董建華23條時候都會腳痛,思歪都唔畀佢連任懲罰佢,究竟林鄭玩緊咩?

我得到唯一解釋就係:拖。

只要捱埋個九月,當十月係公布到施政報告,就代表個立會開始順暢番,屆時建制派功能組別就會翻齊人一齊舉手投票,暴力通過法案,其實之前都試過一次。

之前勇武派搞爛個議會,其實幫香港人集到好多氣,搞大件事上國際,亦令香港成為中美貿易其中一隻牌。中央唔可以出老解,但呢個時候放老戴,同一時間左膠叫緊咩二萬分,都係想成件事降溫,然後中央命林鄭明修棧道,咩咩咩同市民對話,然後叫班狗仔落力拉班砍人癡線佬,降低小小民怨,再叫大波MADAM吸下粉轉下風向;實質就係想拖延到立會開番,屆時就可以通過法案,呢個亦都係佢點解唔叫撤回嘅原因。

如果我無估錯,下一步政府應該好快放一部份義士出黎,企圖降低民怨。田少所講嘅十月一日死線唔算錯得曬,其實係十月之前要解決,否則過唔到法案都幾麻煩下。

其實點解美國佬要干預呢件事,好簡單,因為美國佬有利益係香港。當中可能涉及資金流向之類,美國要係香港通過法案之前撤資,否則中央就會用任何藉口係香港捉美資老闆,以人質交換返孟晚舟返黎,以及捉曬班用香港走錢嘅江系餘下殘將。所以政府拖到十月,就會開展施政報告,有機會林鄭派大糖,每人派八千一萬,等大家沉溺係快樂之際,再係你唔覺意時候通過法案。

吾有一計,望各位勇武派同和理非一聽。

而家決勝點,就係十月施政報告一出,只要施政報告一完,佢一派完糖,大家個信念就會鬆,立會就會開,惟今之計,係唔可以令施政報告順利進行,姐係要再癱瘓個議會,直到林鄭話撤回或者下年立會完結,我地先可以叫贏住一千分。所以用自己嘅方法,令林鄭無辦法公布施政報告,同埋立會癱瘓一整年。

呢個八奇思考領域係咪對確,十月便可知。



原文連結