2013-10-01

【獨立媒體】黃之鋒:國慶示威後記 (895)

1276152_644761528889590_1857587843_o

本以為入到升旗公眾觀禮區,學民思潮承諾唔會嗌口號,更無帶示威標語進場,只會以無聲抗議既方式,o係升旗既時候高舉全民提名既手勢,估計警察叔叔同保安極其量只會重重包圍住我。

誰不知民政署既保安(定城管?)就o係未交代我同黎汶洛違反咩法例同《觀禮守則》既情況下,強行用武力將我地抬離現場,對我地拳打腳踢,在場既灣仔區總督察就當無事發生,無動於衷只係冷眼旁觀。

香港一向係講理性既地方,警方同民政署如果覺得我地做既野唔恰當,甚至擾亂場內秩序,大可以根據法例請我地離場,我地都唔會刻意為難,願意同執法者盡量配合,但o係末交代既情況下,就突然抬離觀禮區,只係破壞警民之間既互信,我只會問到底香港係一個法治社會,定係人治社會?

548456_642081135824823_788810281_n
攝:Nathan Tsui@USP

學民思潮只係希望透過國慶既示威行動,證明我地對「全民提名 全民普選」既堅持,即使我地無政治學者教授既知識,但對於「政改運動」絕對唔係得個講字。

特首返屋企睇新聞既時候,我真係希望佢 — 梁振英 — 反思一下,點解學民思潮幾十個學生,難得有日假期休息,都要晨咁早五點幾起身,住元朗屯門既甚至四點幾起身,自已夾錢零晨坐的士去灣仔示威?

只係因為我地唔願再做「二等公民」,深信每個香港人都值得擁有提名同投票選特首既權利,學生唔應該只係關注教育政策,關注國民教育……香港社會,以致香港既末來,我地學生都一樣有份參與其中。

Hardsell 都要講句,期望大家支持學民思潮既政改方案,方案包含既唔單止係政治制度既細節,更包含著學生運動鍥而不捨,無謂無懼既精神:

全民提名(全民組成提委會)
全民普選(一人一票選特首)
只因 — 相信平等



原文連結