2014-01-22

【主場新聞】陳政善:比條路行下,唔好搞鄭艷麗得唔得啊? (7443)

鄭艷麗以前拍落嘅寫真照片

鄭艷麗以前拍落嘅寫真照片

「比條路行下,唔好搞佢得唔得啊?」

呢句係我今日睇到《壹週刊》搵狗仔隊「報道」息影女星鄭艷麗近況後,第一句諗到嘅說話……。呢篇報道,首先就話人為咗「避世」,改英文名,特登揀客人少嘅夜晚工作,跟住就話佢曾經為咗殺出條血路,所以做三級女星,但裸露演出以失敗告終,「唯一收獲係得到台灣富商黃任中垂青,做佢契爺」,契爺死咗佢就失去經濟支柱。

如果佢真係冇咗經濟支柱,要出嚟做嘢,咁記者大佬們比條路行下都得啩?仲有啊……

一、你都識得話人避世,仲去搞人,仲去影人番工?而家人哋隨時連份工都冇埋。

二、可能香港地而家淨係推崇地產股票金融行業、炒炒賣賣,覺得一夜暴富先係人生理想。但其實,殷殷實實咁參與勞動,默默耕耘,從未剝削、欺騙或傷害他人的無權無勢打工仔,自力更生,不是更有尊嚴嗎?

仲有啊,做老麥、「落力為客人落單」唔係香港好多普通市民嘅寫照咩?大家都係打工仔,點解要咁樣睇低自己人?

三、報道寫到「被包養」係女影星出道嘅理想咁,事實又係咪咁呢?我哋或者唔可以否認好多影星都因為被包養或與成為富豪情人退出影壇,甚至很多人以此為榮,但絕對唔係個個都係咁,記者同埋讀者都冇理由「老屈」任何一位女星,包括鄭艷麗嘅職業理想同目標。

四、最後喇,我地憑咩去嘲諷、恥笑一個自食其力嘅人嘅人生?人人都有唔同嘅謀生方式、生存方法,無論佢係大紅大紫嘅電影明星,定係住公屋、做快餐店嘅基層婦女,都各自精彩,喺人生入面奮鬥,值得我哋尊重。



原文連結