2014-05-27

【輔仁媒體】林非:大陸趕絕會計師,業界社運界噤若寒蟬 (1197)

大陸 航空母艦 強國

會計師被大陸彈弓手玩殘事件,業界人士,以至社運界,都好似集體失咗聲咁,香港仲講乜嘢「有好強嘅公民社會」?會計師某程度上就好似海怡人咁,之前廣東道抗議佢哋嫌人「激進」,「文革」,「死本土怪膠」,殺到埋身先驚覺事件可以惡化得幾快,但無抗爭經驗乜嘢都唔上手。

社運界又到今時今日都拎唔出本土論述,重覆講咗好多次,四個字「推己及人」,佢哋又只係沿用左派嘅階級論述,得出嘅結論永遠只係「大陸人因為係勞動人民所以只係受壓迫嘅一群因此無任何問題」,反而香港呢個資本主義社會培養出來嘅人就彷彿有「原罪」一樣,講到尾又係覺得「大家都係中國人」,你當佢一家人,佢有無?點解要殺絕會計師生計?

從來無人話過精要係「排外」,你暗戀陳雲無待堂係你嘅事,大家都明白香港作為一個「國際都市」係要兼收並蓄,問題正正係而家根本唔兼,唔收,唔並,唔蓄,全部都係靠向大陸,仲要係有彩就大陸拎,有鑊就香港孭。由基建到會計業都係咁。港珠澳大橋香港出錢最多,高鐵香港天價起慢鐵,會計業唔畀你做但要你孭飛簽名,呢啲唔叫搵羊牯叫乜?呢個時候仲有啲人望住自己果塊好似好有「保障」嘅餅仔,然後扮晒睇通睇透咁話你班香港人咁焦躁真係廢,「本土怪膠」,「無邏輯」,「唔理性」,「唔客觀」,呢種象牙塔入面嘅沾沾自喜簡直令人作嘔,對於現實之無視亦係跡近虛偽嘅無恥行為。



原文連結