2014-11-16

【輔仁媒體】威廉軒:香港癲完未? (5601)

Zulu Lo 攝

Zulu Lo 攝

常言道:「上帝要你滅亡,必先令你瘋狂」,那麼,香港這五十天是否進入了青山醫院?

好多人都話國師係痴線佬一個,但偏偏有咁多人去BUY佢個套,又有人肯陪佢一齊去拜宋帝、去接受佢號召去佔領旺角、甚至而加可以係關帝廟前拜堂成親……,你話佢係一個痴線佬,咁點解竟然有咁多人會信佢講嘢,而唔去聽所謂的「正常人」枝笛。究竟今日係「常人」出現問題,定係有一大班都痴咗線呢?

七個差佬抬人去暗角打人,呢樣唔係最癲,最癲係有隻禿鷹出嚟話:「究竟想指控邊個打佢,呢啲都未搞清楚,搞清楚之後會依法辦事」,我頂你個肺呀,真係唔講粗口都唔得,呢D擺明係刑事案件,你自己有責任去查,你而加問番人想告邊一件?你當而加皇帝翻牌子,想今晚搵邊個妃嬪服侍?

刑事你可以民事化,最緊要係民事都可以刑事化更癲。話說個果禁制令,明明係一件民事案,律政司居然可以主動同申請人傾下點樣執行禁制令,而件禿鷹話,要出動所有人去協助執行禁制令,仲可以搵其他法律去拉人添。青關會又唔見你咁主動掃場,港大法律學院教授陳文敏:「呢單官司係民事,潮聯係要話到畀法庭知,攞到個命令係有能力執行,你唔係叫警察幫你去執行,你要警察執行,唔該你畀錢。」

然後,香港個立法會都癲咗。左仔一向癲係眾所鳩知,有個葉門劉氏婦人話佢唔敢去台灣,因為台灣特工會影佢出浴照……,呢個唔係重點。黃毓民提出:「全民制憲,重新立約,實現真正『港人治港』」議案。呢個議案只有五票贊成,包括黃毓民、梁國雄、陳偉業、范國威、陳志全。左仔固然舉手反對,但其餘十七個泛民都棄權。你班泛民怕俾人話你支持港獨,又唔想投反對,所以要含淚唔投票?由「民主回歸」到而加,俾人老點咗三十年,都仲要繼續攬住中共?你仲想我下年含淚投票俾泛民?我下屆不如投俾巴絲光連(高登巴打絲打光復區議會連合陣線),或者係香港復興黨。

沒有最癲,只有更癲。下星期一,港紙冥通化殺到嚟了。

究竟呢個香港仲要癲幾耐先可以回復正常?幾時先去到發癲的盡頭?香港幾時先可以出院?



原文連結