2014-12-06

【輔仁媒體】阿享:Mama,Kpop,陳奕迅 (4139)

可能你唔知,Mnet Asia Music Award(下稱Mama)已經第三年落戶香港。但今年,因為一個陳奕迅,一首《浮誇》,洗版了,你知道有班泡菜黎香港搞大龍鳳。

利申,我係一名泡菜L。所以對於有人肯現兜兜拎二千銀睇個show的人,我絕對明白。所以,我唔會恥笑任何人。

陳奕迅唱得好唔好,就視乎你認為一個歌手既現場演出應該係好好咁完成一首歌,嗌嗌嗌唔停;定係講唔上完美,但感情豐富,好似講自己故事咁。至於點解揀《浮誇》,信眾們可以自己參透下「神」既意思。而從技術層面睇,就擺明係騷「quali」喇!

感謝Mnet,有說香港依家亂到暴動咁,但今年仍然邀請到GD、太陽、IU、Exo等既國寶級「外交大使」黎香港,而且仲全場爆滿,唔通呢啲人唔怕俾暴徒打死?有冇高官同藍絲帶可以出黎講兩句,尤其係個位旅發局主席加娛樂大亨。

好多人話陳奕迅今次既出場費應該好和味,Of course!Mama既下半場,你記得邊個係Eason出場之前出場嗎?係朴總統呀(雖然係錄影講話)!你有冇係任何一個音樂頒獎禮見過梁振英(Sorry其實冇人想見到佢)?簡單黎講,Mama絕對唔係單純既喊喊喊,多謝paco樂小姐楊生神佛老婆仔女既港式頒獎禮,而係南韓外交政策既其中一個「重中之重」活動。而頒獎禮背後更係孭住一條強大既產業鍊(旅遊、化妝品、服裝、電子產品等下刪一萬字)。梁振英,你識條鐵咩?

其實聽到劉天華上台頒獎要講普通話,真係要借之鋒名句「仲難聽過粗口」一用。如果你有睇過韓國既綜藝節目,就知佢地一定唔會混淆強國同香港。但點解?都話左係重要外交活動,你要睇下大老闆想討好邊個至得架。

每次睇mama,尤其係香港搞呢三屆,都會諗一個問題:「點解都係同一個地方,人地可以搞得咁好?」還記得每年香港既亞洲流行音樂節(製作係由大台承包的),唔係啲音響無喇喇無聲,就係鏡頭唔知影左啲咩,每次都馬騮遮眼。

作為一個泡菜L,我不諱言,有7成kpop偶像係唔識唱歌的(呢個數字可能已經算保守)。但係極度商品化同太多人唔識音樂(包括我)既大環境下,音樂就無關技藝同創作,it is all about Marketing!kpop既行銷計劃同動員能力我唔花口水再多講,反正網上有更多更鉅細無遺既論述同文章。但可以肯定,靚仔靚女,睇樣同睇身材,一路都只係吸引初階kpop fans,同唔了解kpop既人既錯讀。可惜係香港好多所謂資深傳媒人都係咁諗,但個遊戲根本唔係咁玩。最簡單,你問我香港鍾意「都教授」金秀賢既人多,定鍾意其貌不揚既Runningman中年男主持劉在石既人多,分分鐘後者跑出。

偶像往往被包裝成一種「態度」或一種「性格」,某程度同你買電話一樣,你消費既唔單單係功能,係生活態度。例如GD就係「潮」,有才華。當然,呢啲你可以唔認同。但,所有消費都係唔理性架喇!

今次「陳奕迅化身民族英雄唱贏泡菜明星」既逆向操作之令人讚嘆。Eason型左、香港人爽左(朋友話微博好多強國人講為國增光,哦)、mama賺左話題性,三贏!大台,我已經無心情再羞辱你,但都唔該你睇下求婚係幾咁低手。

最後,我只想講一個現象。就我所知,今年mama有三位香港歌手出席。以eason既年紀,絕對可以生得出exo(年紀最細既成員係20歲)。而劉華或者譚伯,好彩既話,bts防彈少年團做得佢哋個孫(年紀最細既成員係17歲)。你問心,三十歲以下既任何一位/一隊香港歌手,你識唱佢多過十首歌既有幾多位?如果因為一首《浮誇》你沾沾,咁你同啲大人叫學生立即退場,話你哋已經贏左有咩分別?



原文連結