2015-07-28

【輔仁媒體】姐死姐還在:「離哂譜,我個暑期工『竟然』resign 呀!」 (3658)

手機女孩敏截圖

上星期五lunch過後,例牌出席八婆同事聯合舉辦嘅「齊齊飲中產咖啡暨講是非大會」…

公司七月起來左好多暑期工,屈指一算,D 暑期工都返左三個星期。呢三個星期不時聽到D 中高層講暑期工壞話,從佢地嘅口吻同表情,可以feel 到講暑期工壞話係有莫明嘅快感。我真的不知道講暑期工壞話有咩著數,可能係傳統,就好似強姦犯坐監例牌要畀其他犯搞一樣。

所謂嘅壞話,都係無無謂謂嘅…

中高層又好似佛地魔咁,真係唔明哈利波特得罪了你甚麼,總之,每15分鐘都要搞一搞D暑期工靚仔靚妹。

→ 個個都MK 仔咁,件恤衫又唔燙下佢;邊有人著西褲著小白襪,佢呀媽有冇教佢架?

→ D女仔D裙短到離哂譜,條眼線畫到雙頭marker咁粗,做暑期工都用coach手袋…

→ 「竟然」夠膽公司時間whatsapp 同飲starbucks 呀

→ email D grammar 錯哂,仲話讀XX大學

→ copy 份野,唔識撳sort先copy ,又唔問…(佢唔知有呢個掣你唔教佢,點問呢?)

畀你喺度做暑期工,係皇恩浩蕩,你夠膽死resign!

我做呢間大公司,請左好多平靚正暑期工。靚仔靚妹為左砌好份CV,就算公司出手再低,都會lur飯應來做,想喺CV寫做過大公司。由於應徵暑期工嘅人好多好多,一個data entry 嘅暑期工位,都會搵到個讀「常春藤大學」嘅人來做。

「齊齊飲中產咖啡暨講是非大會」席間,中層同事K講:「離哂譜,做左3個星期,我個暑期工『竟然』resign 呀!」

我心諗,好出奇呀!係唔係要感恩你畀份暑期工佢做呀?做暑期工又唔係坐監,份工唔合理,唔一定要刑滿先出冊架喎。唔係暑期工唔捱得,而係個暑期工有得選擇「唔捱」,亦冇需要為左你個句「D後生都唔捱得架」而捱。

老屎忽們,請檢討下你地點對暑期工…

1. 唔好將手頭上嘅垃圾畀個暑期工做,再話自己畀機會佢學野…

佔了便宜又賣乖,老屎忽趁有暑期工,畀哂D屎個暑期工做,明明著數左,仲要話畀機會個暑期工學野,真係好仆街。

2. 「唔好畀佢停」

「得閒喺度whatsapp,我唔會畀佢有一分鐘空閒架,佢咁會哂左個暑期,學唔到野」。你返朝9晚6都唔係non-stop 一秒都唔停啦,冇野做,唔好製造D野畀佢做,畀佢抖下都得架下嘛。

3. 食左100啖屎,都畀返啖砂糖佢嗒下

我明暑期工咁短時間,一定係打雜。但佢唔係full paid,佢係好應該「學到D野」去彌補返佢咁低人工架。做左100樣垃圾嘅同時,畀佢發表下idea,畀個機會佢喺份工拎D成功感都好呀。

4. 唔好呼呼喝喝,可以嗎?

野要做足,又唔尊重暑期工。暑期工來幫手,點解唔畀返份尊重幫你手嘅人?點解要視暑期工低人一等?叫暑期工做野,態度好D 啦,下下都呼呼喝喝。

5. 笑甚麼,畜生,你都曾經係暑期工…

由第一日返工開始,就由外到內,由返工到放工不停彈佢有咩唔好。人地似MK 仔咁又點喎?人地化妝化到京劇咁,影響到你咩?人地whatsapp 同飲starbucks,你咪又係,笑甚麼呢?

大家唔好對大公司有太大嘅期望…

對於你來做暑期工,我係表示遺憾。大家唔好對大公司有太多幻想,諗住暑期工可以學到好多野,識到大公司高層,將來會帶挈你。唔會架,你只會深明點畀人搾乾搾淨。

我呀媽D師奶朋友對我好有興趣,應該係對我可唔可以介紹佢個仔女入來做好有興趣。我覺得呢,有意義嘅暑期工體驗係一個package,個package 係包括「搵工同打工」,搵畀你,你點會有一個完整嘅暑期工體驗呢?

早幾日知道有個親戚細路搵到份喺「貢丸」樂園嘅暑期工,佢話見到人玩,自己冇得玩,又曬到仆街。但如果我係細路,我會做「貢丸」暑期工都唔做我公司暑期工,我鐘意同陽光玩遊戲,多過喺公司好似死屍咁,喺凍過殮房嘅office度日。

你對個暑期工唔好,佢最後resign,邊個最開心?

我真係好想同我同事講,「你真係抵L 死」,好地地有個暑期工幫你,做哂平時你唔想做嘅垃圾,仲要對人唔好,搞到佢resign,你要做返哂D 垃圾,聽你不停呻「而家D 後生真係唔捱得」,除左「抵L 死」我真係冇補充。



原文連結