2015-08-16

【輔仁媒體】小盛女:而家啲公司沒有最cheap,只有更cheap (4086)

(photo via cc Flickr user K2 Space)

(photo via cc Flickr user K2 Space)

近來每天瀏覽JobsBB、TTgoodjobs等搵工網,發覺現在很多工都會列出一大堆工作內容,要求你集多功能於一身,但換來的只是工時長及零福利,例如請一個Marketing Officer除了需要基本Marketing的工作內容外,包括做sales report、marketing planning、搞活動和展覽、處理投訴等,當然不少得Digital marketing,即是熟悉e-commerce及處理各網上宣傳平台,包括Facebook、Instagram、Wechat等,還要包括PR的工作內容,包括寫新聞稿、pitch記者,辦記者會等,更需要你是一個designer,要懂得用photoshop或ai砌各款POP,可能你會話,基本嘢姐,我完全附合以上要求,那你要求的待遇是甚麼?萬五蚊個月?五天工作?醫療保險?雙糧?花紅?只能說:「少年,你太年輕了。」

儘管求職市況如此慘淡,小盛女還是繼續努力send CV搵工,無計,無父幹係咁,5.5day咪照send囉,有時星期六日公假期要返工?無問題吖!要加班?預咗添啦!可喜可賀半個月後終於收到電話叫我去面試,還要是很出名的大公司,一個基本上人人都認識的品牌,心情當然十分興奮,亦做足準備去面試。面試前突然醒起某朋友的朋友好像曾經在這間公司任職,當然立刻叫朋友幫我去收收風,怎料結果是叫我不要去面試,因為這間公司很賤,但我想這既然是大公司,見吓又唔會少塊肉,見一見也無妨啊,即管睇吓佢有幾賤囉!

面試程序正常,先做一小時筆試,然後見人事部經理,公關部經理及總經理。首先人事部經理說我慘慘豬,前一份工只有7天大假,早該辭職,並說這兒有14天大假,又說這裡是5天工作,不過合約會寫5.5天,同事可彈性回來工作,而且有一個月雙糧,不過人工方面可能無咁多budget,問我底線是多少(基本上10個HR11個都會問),於是我就傻豬豬地自降身價說萬四也可接受,而我本身的預期人工是萬五。接著是見公關部經理,她說忙的時候會加班至11、12點,星期六如果公司有需要都要隨時返工,更不會補假或補錢。最後是見總經理,她說除了在office工作,有時還要在公眾假期到店裡幫忙,我心諗,即係做埋customer service啦,不過我份人都好有體育精神嘅,好頭好尾,好好地見埋佢,於是總共見了三小時。

「你好啊,我地覺得你表現都唔錯,而家比個offer你,你睇吓O唔OK吖!」人事部經理對我說,想不到這麼快便有offer。

「好啊,你講啦。」我說。

「人工我地可以比到萬四,不過其中兩千蚊係performance bonus,要睇你嘅表現和出勤率嚟決定比幾多,而第一個月亦只會出萬二。」人事部經理說。

「吓?即係個個月我都唔同人工?」我問,然後心想乜事啊呢間嘢。

「係啊,同埋如果未做夠一年,第一年係得7日大假。」人事部經理說。

「吓?你琴日又話有14日?」我問。

「係啊,不過做夠一年先有,同埋我地有花紅,6月就出一次,出返上一年嘅1至12月。」人事部經理說。

「吓?即係由而家做到下年6月我先可以拎8月至12月嘅花紅?咁你琴日講嘅一個月雙糧呢?」我問。

「雙糧就等如花紅囉,而且我地會用萬二嚟計。」人事部經理說。

一句到尾,即是乜_都係佢講晒!一句表現唔好,我人工就變萬二,仲低過之前;一句公司需要我,我就變5.5天工作,仲衰過之前長短週;一句雙糧變花紅,就得返丁屎咁多多錢,仲少過之前。如果我咁都答OKAY我覺得我真係對唔住我自己,其實我轉工都只是想由18層地獄跳上17層地獄,而你給我這個19層地獄,我實在啃唔落,只好跟你說句:「唔 好意思啊我已經有更好嘅offer喇,拜。」

P.S. 本篇由真人真事改篇,如有雷同,實屬不幸。



原文連結