2015-10-23

【輔仁媒體】Amethian:老鬼就可以反檯鬧下莊? (7988)

HappyConDay本地某四大學府之一嘅某學院con day!!!!好型好爆好man!!!! 典解嘅?典解嘅?典解嘅? 好西利呀!喂老細!細力少少呀張枱我地有份比錢架喂!嗱同學留意返!片中含有大量未來學生領袖及學生領袖老鬼!極有可能得到過你投嘅票!所作行為極有可能代表你地!恥笑之餘切勿跟車太貼!以免車毀人亡!!!!

Posted by CityU SU Sucks 城大學生會【極醜惡】 on Thursday, October 22, 2015

老鬼係乜?老鬼就係一種畢完業無料發圍,只能透過 Con Day 蝦細自己幾年嘅 Freshmen 搵返多少成就感嘅垃圾。心態仲停留響「我當年搞支莊搞得有聲有色」嘅階段,質疑人地「我做到嘅你做唔做到」,聽落係威係勢,實際上連自己人生都搞唔掂,出到黎社會連做粒齒輪都掹車邊。

即係咁,你讀中七果陣,會唔會專登走落中一班房,拍檯拍凳話佢地唔識野?唔會,因為你知道佢地唔識野係正常,你知道學生就係要學野,無論幼稚園定小學定中學定大學都一樣。

既然中七都會有 Sense 唔會去鬧啲中一,咁點解畢業畢左N年嘅所謂老鬼會專登返去 O Con 屌啲新莊唔識野?喂你話你仲讀緊書,新莊政策有可能影響到你都仲講得過去丫。問題係你畢左業喇喎,廿幾就快三十歲,走去同啲十八九歲小朋友計較?無野下話?咁算係個人智力倒退,退到連中學生都不如嗎?

我知,好多老鬼會用「巡視業務」嘅心態去睇 O Con。開口第一句就係「原本我淨係諗住同我啲莊員返黎聚下舊啫,估唔到你地呢一屆候選莊差成咁,搞到我忍唔住講兩句……」然後不停擺佢個老屎忽,話人地點點點唔掂,有啲仲會順便抽埋現莊水。明明已經無 Title 甚至已經畢晒業唔知幾多年,但心態上仲未調整到,以為自己上過一年莊就知天下事,有資格對人指手劃腳,被人質疑就問人「你上過莊未?」。呢種人圍內有個講法,叫「落唔到莊」。

所以話「人會隨年紀增長變得愈來愈成熟」呢個講法,向來只有概然性,無必然性。唔少人出到社會,見到好多留響溫室入面見唔到嘅光景,就會開始墮落、退步,只能夠日日夜夜抱住昔日「大學生」、「上過莊做乜P乜秘」呢啲身份黎打飛機,比周圍同人講自己會考幾多個 A 嘅盲毛更可笑。

強者挑戰更強者,弱者欺負更弱者。下次喺 Podium 見到啲叔叔指住班小朋友黎鬧嘅時候,大概都可以估到佢嘅人生有幾咁失敗。

P.S. 我知道有現屆莊員或者上過莊嘅朋友好認同我呢番說話(我個人 A/C 個 Inbox 係咁跳 lol),但礙於怕影響同莊員或者上莊關係而唔敢 Like / 唔敢 Share。其實唔緊要的,即管 Share 吧。都過左咁耐,有 Sense 嘅 Jongmate 都會明白,對你只會有共鳴,唔會有怪罪。至於無 Sense 果啲,你問心,Keep 黎都無意思啦。記住莊只係上一年,但人生係有幾十年架,老友。



原文連結