2017-06-06

【輔仁媒體】鵝鑾鼻燈塔:歐陽偉豪(Ben Sir)除左識教粗口仲有乜? (958)

睇報紙,見到話依家歐陽偉豪好紅,又上電視,又拍廣告,甚至會拍埋戲。但佢既底線係,三級片免問。

我成日都會好感歎,香港呢個城市,究竟想追求既係D乜。市場,就會係呢D需求度忠實咁反映出黎,係無得呃人。我仲記得隔離茶餐廳有兩個人講起歐陽偉豪係邊個,另一個即刻答:佢呀,教粗口好叻架。咩粗口都識架,而且解得好清楚。勁!

就好似歐陽偉豪除左識教粗口,無其他。

而每當諗起歐陽偉豪我又會諗起另一位同樣係中大中文系既王貽興。我地姑且唔好去評佢一開始去參加文學雙年獎既得獎作品係D甚麼吧,佢依家係人心目中既又係一個咩人?可以係書展一出十本書既流行暢銷書作家?定還是佢好引以為恥地係無線謎入面既奇特演出藝人?咁依家佢係ViuTV 既表現,係咪又令佢覺得好過一D,而且自己既定位明確左?

成日都有人問究竟點樣可以做到小說家呀,文學家呀。睇住以上兩位人物既例子,我都唔知究竟可以俾D乜野建議,方為之最正確。當然我相信,佢地心底裡係真正想人地睇佢地真實忠於文學/甚至好學術/好藝術既一面(我大膽假設有啦),但係如果歐陽偉豪唔係面容恢諧地係鏡頭前面同麥美恩呀講佢既「奔走行」,而係講番甚麼句法對比;而王貽興又甘願放棄鎂光燈,去閉門寫番好似佢一開始出道「無城有愛」既文學式寫法,唔知佢地仲有無依家既名氣,甚至養唔養得起一家大細呢。

可能佢地隨波逐流,但係一D唔介意,做人始終亦唔需要向人解釋,只需要忠於自己。只要放大D,仔細一睇,其實咩野都係一樣:

好多人都想做理想做既野。但大勢所趨,無人欣賞,尊嚴都要放低。陶淵明都話有塊田等佢,但城市人,無飯開,無樓住,就係社會最低等。好多時我地都指指點點話人地標奇立異,語不驚人。其實講到心底最深處,究竟你黎選擇,又會點選擇。市場、點擊率又幾時變成一切,容不下半點附庸風雅,係有理由的。

(編按:奉BEN SIR諭,TALK SHOW 仲有位,去hkticketing 買飛

關於作者:鵝鑾鼻燈塔
鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/



原文連結