2018-09-21

【輔仁媒體】神婆:【塔羅個案】其實人地會覆你短訊可以係出於禮貌,唔代表人地鍾意你⋯ (341)

好多時啲客黎到問感情,無論男女,都有種傾向,就係將心儀對象嘅行為諗出幾十種理由去解釋。

我聽過最誇張嘅例子係,有位女士返到公司,發現份早餐杯飲品錯左,佢要熱華田,餐廳比錯咖啡,但女子唔鍾意飲咖啡,結果佢隔離位男同事就用自己杯檸茶同佢換。

然後位女子就覺得人地係鍾意自己。

不過充滿少女粉色幻想嘅,其實唔係女性嘅專利,例如今次個案化名嘅 Tommy。

Tommy 單身,佢話自己拍過拖,雖然當時手無拖過、咩都無做過就比人單方面處決左,都唔知有無兩星期,不過佢話呢一次係拍拖就拍拖啦。話說 Tommy 最近鍾意左個女仔,對方係朋友嘅朋友,做 Audit,有時要返大陸,工作幾忙。

Tommy 想知同對方有無發展機會,我一路洗牌一路問佢而家嘅狀況。

「你地私底下聯絡多唔多?定而家未熟?」
「我有試過私底下 Whatsapp 佢,佢會覆我的。」
「咁有無約出黎食過飯?」
「有次我同佢早左到,朋友未到,一齊飲過杯咖啡。」
「你肯定對方單身架可?」
「應該係。」

聽到呢度,其實你地即係唔熟啦……我個心咁諗。

不過唔緊要,唔熟都唔代表無發展機會,將來嘅野無人知,係咪先?首先我幫 Tommy 睇下對方 So far 對 Tommy 有咩睇法,點知開牌出黎,皇帝同塔,兩隻都係逆位,我扁一扁嘴,喂,Tommy 哥你又講到大家一齊玩時,人地對你「有眼神交流」同埋「刻意望你」,又話大家飲咖啡時「大家願意交心對話」,咁點解副牌咁嘅?

「即係點?」
「相當麻麻地噃,簡單黎講,佢一開始就已經否定左同你有發展嘅可能,就算做朋友,都唔見佢有特別欣賞你嘅地方。」我有少少苦惱,「唔好意思,唔好介意我講野直接。」
「唔、唔緊要。」Tommy 個樣好疑惑,「你…比我消化一陣。」

之後 Tommy 再問「如果主動追求佢會唔會有好結果」,開牌出黎,喂呀,逆位審判加隻正位惡魔,簡單黎講就係「唔會一齊」,直接啲講就係「吓我唔會同你一齊囉,做兵係你嘅事」。

我選擇左同 Tommy 講簡單嗰種解釋。

點知。

「我唔係懷疑你唔準,神婆。」Tommy 神色凝重,「雖然副牌好似講得好差,但係,我都想相信自己感受到嘅真心。」

「咩野真心?」我真心疑惑,唔通你地私底下談話上至天文下至地理,講埋幼稚園會返學校玩煮飯仔呢啲所謂真心話?

「我私底下 Whatsapp 佢,佢會覆。」Tommy 眼神好堅定,「雖然唔係個個覆,雖然覆得好短,但係佢唔係漠視我的。我覺得我喺佢心目中,係有份量的。」

Tommy 拎出電話,比我睇左部份短訊內容。

「今日好熱」
「你做野點呀?」
「係咪好忙?我唔阻你」
「你係咪鍾意食辣野?下次不如去食水煮魚」

然後女士喺五個鐘後覆左佢一句「yes quite a busy day as usual」

我睇到呢度,再諗起 Tommy 嘅說話,我真係心諗……。

即係咁,係呀,Whtatsapp 心儀對象,佢完全唔覆你,當然可以理解為「佢唔想同你講野」;但係,人地會覆你短訊,唔代表人地已經對你芳心暗許架噃!我一日收幾多 Inbox,客嘅又有,網友都有,唔通我每覆一個人都代表我鍾意人?喂死啦,原來我咁濫我自己都不自覺,係咪咁講呀?

結果我平心靜氣同 Tommy 講,「其實咁樣都唔代表啲咩,覆個短訊可以係禮貌(或者 hea 你),唔一定要諗得太複雜的。」

Tommy 嘆一口氣。

「神婆,我以為你都係個性情中人……」
「………」

乜L野性情中人?我真係忍唔住……yes,反個白眼先,各位團友,我今次反到去哥本哈根(因為我一個好朋友剛剛去左哥本哈根)。你想知我答咩?唔會啦,仲講,收錢送客算啦,一陣同佢傾多兩句以為我想追佢就唔好啦,得罪講句,真話我就講左,不過真話通常都難聽嘅。最後惟有祝 Tommy 追夢成功啦!

【塔羅牌個案分享】

你話想生仔我咪唔避孕囉,我家下有咗你就叫我落?
名校老師婚外情的故事
女人就黎三十歲仲係 A0 係咪就叫有問題?
中女不諱言「我有 SP,但我唔會同我老公離婚」
老師的成功要訣:識人、埋堆,攀附權貴;作育英才已經行唔通。
邊個講出「分手」兩個字,邊個就係萬劫不復嘅千古罪人
女性客戶開口埋口「我認為」,咁你有無理過對方點諗先?
我以為個客擔心病母健康,原來佢只係想快啲分身家
有位想投身藝能界嘅女子同我講「紅咗我會提攜你架啦」



原文連結