2018-09-17

【獨立媒體】Charlie Chen:颱風名都搞錯 李家超返去捉賊算啦 (1924)

今早落樓,發現九巴停止服務,好吧,改坐港鐵過海,結果在金鐘站遇上萬人空巷。等車期間就睇下班官見記者,結果又係睇到怒火中燒。尤其係大讚《文匯報》幾好睇、睇了幾十年的保安局局長李家超,竟然連個風叫咩名都搞錯,香港要靠你去領導救災?

一開場,行政長官林鄭月娥表示「呢個颱風真係超強」,又呼籲僱主不要因為上班遲了便扣人工和沒有勤工獎,需要社會全民一起恢復秩序。

突然間,聽到旁邊的李家超話,「天竺」製造出來的破壞是嚴重和廣泛,呢下真係聽到一把火。局長,你呢兩日其實有冇返工呢?有無開跨部門視像會議呢?個颱風叫「山竹」,唔係「天竺」。但唔止呀,李家超仲話經過樹木時要小心,要繞過有機會製造風險的地方。即係有事,政府就唔負責,你哋啲蟻民自己睇路啦。

一直以來,這位保安局局長都態度惡劣,目中無人,單是早前的取締香港民族黨陳浩天已經令人感到無比反感。「天竺」,我特登等直播完了,重聽一次,真係無聽錯。這位自稱十年來都看《文匯報》學中文的局長真係貽笑國際,連個風叫咩名都傻傻搞不清,「天竺」?和尚就去天竺,唐三藏就去天竺取經啦。李家超講多次你聽,個風叫「山竹」,你都返去捉賊吧啦。

香港人就係要交稅養埋呢啲咁嘅官,真係命苦。林鄭月娥,你叫市民互相體恤?你有體恤過市民?



原文連結