2018-11-19

【輔仁媒體】阿享:表忠只係市場需要,同整容練大隻無分別 (1787)

今年金馬獎因為最佳紀錄片得獎導演傅榆嘅一番「希望我們的國家可以被當成一個真正獨立的個體來看待」言論成為兩岸焦點。要返大陸搵食嘅藝人又得到一個可以表忠嘅機會,立馬喺微博share「中國一點也不能少」呃like。不意外地,中港藝人之外,台灣藝人都不得不跪低。

每次一有呢啲大型表忠事件,都令我諗係以前讀書時嘅一件小事。話說當年我仲係ive仔個陣,同一班有班女仔成日都標榜佢哋之間嘅感情好好,即係面書post相就會話「感恩識到你班好姊妹,要一世相愛落去」個啲肉麻到震嘅姊妹情義。

然後,某年同佢哋去長洲入camp,呢班好姊妹因為好小事無喇喇鬧大交,終於喺東灣沙灘坐咗兩,三個鐘後拆返掂,和好如初。誰不知,佢哋好返之後先係最難頂,左一句「我哋係一世好姊妹」,右一句「無嘢再令我哋再嘈」。

但只不過一個鐘之後,一班人一齊玩Killer,記住只係玩,又令佢哋進入信任危機。呢個又話「我真係諗唔到你原來咁假」,下一個又話「如果最後killer係你,我會好失望」。結果真係killer個位仁兄去到最後選擇咗自我了斷,因為大家都feel到勢色唔對,不如嗱嗱聲玩完佢。

自此之後,我知道所有講畀人聽嘅忠誠同幸福,十居其九都係假!就好似啲情侶真係sweet,真係關係好,又使乜成日喺ig放閃畀人睇,就係無先要造出嚟。原因不外乎都係有人鍾意我咁做,我咪咁做囉。有無個人意志,有無違背良心,唔到你去諗,亦唔需要你去諗。

所以講返微博表忠呢單嘢,其實睇咗咁多年,呢啲嘢都已經化哂。藝人,都係打份工,要因應個市場鍾意啲咩而改變自己。好似韓國偶像就要跳得唱得,副偈仲要睇得;日本偶像就要笑容好,有親和力,容易接近。咁大陸呢?咪就係要你向偉大共黨政府表忠。要來賺大陸人錢,就不要跟指導思想對著幹,要麼歸順,要麼滾蛋,一切都係市場導向。

對呢班人嚟講,轉發「中國一點也不能少」同要佢哋整下容、學做戲唱歌,或者練大隻一樣,都係啲人鍾意乜我咪做乜,都係一種自我增值,只要保證我可以繼續生存到就得,所謂民族大義,國仇家恨都係廢話,不用分那麼細喇。所以我想同個啲覺得偶像跪低好失望嘅人講,呢件事對於佢哋嚟講其實係無感情架!撳個share掣呢啲無成本但係高效益嘅事何樂而不為呢?

最重要一點,真係忠嘅,又使乜表!

關於作者:阿享
一個戒緊牛肉,但打邊爐仍然會忍唔住既耶青。


原文連結