2019-04-09

【輔仁媒體】容樂其:梁振英689無恥就無敵,反對派無腦就無以為敵 (356)

感謝吳文遠加入宣傳除了吳文遠關於我的攪笑廣告,今天蘋果日報沒有任何全版廣告。全國人大代表王敏剛因病去世,蘋果日報刋登李怡的專欄文章,題目是「報應」,這是李怡繼汶川大地震後的「天譴」論和泰國布吉沉船災難後的「自作孽」論後又一冷血歪論。…

梁振英發佈於 2019年4月7日星期日

香港啲政治真係得意過細路仔玩泥沙。今日同期嘅政治新聞,近近地日本係平成最後一次都道府縣選舉,遠少少係英國保守黨同工黨傾緊合唔合作搞脫歐。香港,係反對派搞眾籌登報取笑前特首,現任政協副主席梁振英。

梁振英呢啲全國政協副主席,話就話俾左個國家領導人銜頭佢,但政治現實就係,佢只係一個無實權嘅前特首。平日無咩好做嘅梁振英,日日都會買份蘋果日報睇下佢地有無廣告,然後加句 #恥與為伍,免費幫喺蘋果落左廣告嘅客戶出多轉fb post,退休之後咁委身做義工,其實都係好值得欣賞。

一個無咩細藝,日日撩交打嘅退休人士,呢一刻對林鄭老鼠拉龜嘅反對派,就覺得啄住梁振英來打,係好有意義。同期喺香港發生緊嘅,沙中線偷工減料無所謂、逃犯條例繼續去、樓價年年月月新高、啟德發展區曬太陽曬左幾十年,you name it。喺香港人身邊,日日都有不義。然後立法會唔夠議席唔夠力嘅反對派,一樣嘢都拖唔下馬,而佢地取笑到梁振英,就視為豐功偉績。

香港政府連同宗主國中華人民共和國,只要一日有香港嘅反對派喺度,係唔需要擔心任何嘅管治問題,因為呢班反對派,本來就唔係諗點樣將啲政府做得唔啱嘅嘢拖垮佢。睇下英國嘅在野黨工黨,能夠令保守黨嘅脫歐搞唔成,就逼住現任政府同你傾。香港呢?反對派唔夠票,影響唔到管治,無人需要同你傾任何野。

有乜嘢支持者就有乜嘢政客,香港反對派嘅支持者,就係登報恥笑就會俾錢,激嬲到689就覺得自己贏,都唔好講身為左膠一員嘅吳文遠,呢一刻唔係諗住點樣聲援東北示威坐緊監嘅人,唔係諗點樣支援呢班人出返來之後嘅生計,而係玩膠,仲話要諗下是咪添食,香港左翼社運有呢啲「同志」,係唔需要政敵都足以瓦解一切力量。

而被人玩嘅梁振英,就質疑登報嘅「香港人忍耐力有限公司」是咪真係存在,話反對派連同蘋果日報違反公司條例。

吳文遠和蘋果日報有沒有違反公司條例?吳文遠今天在蘋果日報登的全版廣告,左上角標明「贊助刋登」的是「香港人忍耐力有限公司」。有法律界人士經查冊後質疑:「香港人忍耐力有限公司」有沒有在香港或海外登記註冊?有沒有權用「有限公司」的聲稱?如…

梁振英發佈於 2019年4月7日星期日

中共玩香港人,都預左無咩底線。估唔到反對派領袖及支持者嘅智力,都係無底線。

作者:容樂其
我覺得總編輯都有得出文係常識囉!


原文連結